संवाद

 तीचा आणि माझा संवाद , आताशा कमी झालाय .

आधी तिचे शब्द कळायचे,

पण हल्ली अक्षरं सुध्दा पुसट झालीत .

डोळ्यात खुप काही असत.

माझ्या हातावर तिची पकड होत असते घट्ट.

कायम धडपड चालू  असते ,

तिच्या बोलण्याची , माझ्या समजण्याची 

तीचा आणि माझा संवाद, आताशा कमी झालाय 

—-

तीचा आणि माझा संवाद, आताशा कमी झालाय 

तशी ती दिवसभराची कहाणी ,भडाभडा बोलते 

अथ पासून इति पर्यंत , सारं काही सांगते 

तरी कुठेतरी काहीतरी राहून जात 

खोल ...आत बरंच काही साचून  जात 

तीचा आणि माझा संवाद, आताशा कमी झालाय 

-----

एकीच्या बोलण्यातली अक्षर जुळवताना 

दुसरीच्या बोलण्यातल्या भावना जपताना  

सध्या माझ्याकडे बोलायला फार नसत 

माझा माझ्याशी संवाद सुद्धा, आताशा कमी झालाय 

— मीता मेहेर 

(20-06-2024)